દાહોદમાં તૈયાર થયું 9000 HPનું ઇલેક્ટ્રિક એન્જિન, રેલવેને મળશે નવી રફ્તાર

ગુજરાતના દાહોદ જિલ્લામાં રેલવે લોકોમોટિવ વર્કશોપે 9000 હોર્સપાવર (HP)ની ક્ષમતા ધરાવતું નવું ઇલેક્ટ્રિક માલગાડી એન્જિન તૈયાર કર્યું છે. ભારે માલગાડીઓને લાંબા અંતર સુધી વધુ ઝડપ અને કાર્યક્ષમતા સાથે ખેંચવા માટે વિકસાવાયેલું એન્જિન ભારતીય રેલવેના માલવાહક પરિવહન (Goods train)ને નવી મજબૂતી આપશે.

આ શક્તિશાળી એન્જિન ખાસ કરીને વધુ વજન ધરાવતી માલગાડીઓને ખેંચવાની જરૂરિયાત ધ્યાનમાં રાખીને તૈયાર કરવામાં આવ્યું છે. કોલસો, લોખંડ, સ્ટીલ, સિમેન્ટ માટેનો કાચો માલ અને અન્ય ઔદ્યોગિક સામગ્રીનો મોટો જથ્થો એક સ્થળેથી બીજા સ્થળે પહોંચાડવામાં તેની મહત્વપૂર્ણ ભૂમિકા રહેશે. વધુ ક્ષમતા ધરાવતું એન્જિન લાંબા રૂટ પર માલગાડીઓનું સંચાલન સરળ બનાવશે. તેના કારણે માલસામાન પહોંચાડવામાં લાગતો સમય ઘટવાની અને રેલવેની ફ્રેટ હેન્ડલિંગ ક્ષમતા વધવાની અપેક્ષા છે. તેનો સીધો લાભ ઉત્પાદન, વીજળી, બાંધકામ અને લોજિસ્ટિક્સ જેવા ક્ષેત્રોને મળી શકે છે.

દેશમાં જ આ પ્રકારનું શક્તિશાળી એન્જિન તૈયાર થવું સ્વદેશી ઉત્પાદનની દિશામાં મહત્વપૂર્ણ સિદ્ધિ માનવામાં આવે છે. દાહોદ રેલવે વર્કશોપની ટેક્નિકલ ક્ષમતા વધવાની સાથે સ્થાનિક સ્તરે રોજગારી, કૌશલ્ય વિકાસ અને સહાયક ઉદ્યોગો માટે નવી તકો ઊભી થઈ શકે છે. આ એન્જિનના ઉપયોગથી રોડ ટ્રાન્સપોર્ટ પરનું દબાણ ઘટાડવામાં પણ મદદ મળી શકે છે. પરિણામે દેશની સપ્લાય ચેઇન વધુ ઝડપી, વિશ્વસનીય અને અસરકારક બનવાની શક્યતા છે.

આ પણ વાંચો: ભારતમાં 89% રેલવે ટિકિટો ઓનલાઈન બુક, થર્ડ-પાર્ટી પ્લેટફોર્મનો હિસ્સો 28%